Mat 17 | KYG | STEP | Sigisi'a afina'mo utegeno Yesu'a Pita'e konaga'ala'moganimo Yemisi'e Yoni'enagi huno yatala avefi'mo apavalelino haino apakai'apige'mo apaote mai'nae.

Matthew 17

Kalaisi'a aeto agufa agufamo alino hamale'niya gemae

(Mak 9:2-13; Luk 9:28-36)

1 Sigisi'a afina'mo utegeno Yesu'a Pita'e konaga'ala'moganimo Yemisi'e Yoni'enagi huno yatala avefi'mo apavalelino haino apakai'apige'mo apaote mai'nae. 2 Apaulagale'mo aeto agufa agufamo alino hamale'niye. Augosafati'mo yegegana huno le'nigeno kukena'alegati'mo ha le yakana huno yaveyave'age hu'niye. 3 Malage hu'ana Mosese'e Ilaiya'e'mo apaulagale'mo afole aite'ana Yesu'e'mo kege hu'ana mai'nage'a apake'nae. 4 Pita'a Yesufe'mo, Ala kava nene, manile maisunana kanale hugiye. Kahau'nisiya'mo'mo manile lole'e mago'e yasi no'mo kigune. Kagae no'mo kite Mosese no'mo kite Ilaiya no'mo kite huta kigune, huno ha nepaigeno'ae'mo 5 mago hiya'mo aeno ha le'niya hiya'mo'a kino apati kae'nigeno mago agemo hiyapati'mo huno'ae'mo, mani vekae'mo nahau nayamopafi'mo ne'nahaiya mafa'ne'nimo mai'niye. Agaefe'mo lusi kava hu'na amuse hu'na ne'atovanagi ge'amo alagepa hutapa afiyo, huno hu'nige'a 6 afite'apae'mo ge'amo ne'afiya vaya'mo apaugosalegati'mo apago'ya faite'a ai'a ati kae'a mai'ne'a lusi kava hu'a apamo'yamo ai'nae. 7 Yesu'a eno apame aliteno'ae'mo koli osutapa he tiyo, huno hapa pai'niye. 8 Ali'a maku hu'a agayana mago vaya'mo o'mai'nageno Yesu'a agai'age'mo mai'nige'a age'nae.

9 Avefati'mo atale'a nelami'apae'mo Yesu'a hapa paino'ae'mo, age'naya kavafe'mo mago vaya'aife'mo hapa opaitapa afa'a maime maime viyo. Vemo mafa'nemo kanolufati'mo alino he tino atetesigetapae'mo hapa paigae, huno hapa pai'niye. 10 Ge'amo ne'afiya vaya'mogi ge hu'a afi ge'nae, na kava hige'apae'mo ke'aepa gemo avo'mo kae'a ali'a apaya ne'malaya vaya'mogi, Ilaiya'a hogoteno eminegaiye, hu'a nehae, hu'a ge hu'a afi ge'nageno'ae'mo, 11 He, lama gemo hu'nae. Ilaiya'a halate alagepa hu'a maisayafe'mo eno alino alagepa huno apategaiya'monanafa 12 Ilaiya'a ago e'niyana age'a aeto osu'ne'a hapau'niya kava'mo akame hu'a ago amagi'nae. Ani kava hu'a Vemo mafa'nelegamo hosu kava'mo hugae, huno hapa pai'niye. 13 Ge'amo ne'afiya vaya'mogi ani gemo afite'apae'mo, Yoni'a ani faleno ne'apateya vekae'mo nehiye, hu'a apakesa afi'nae.

Kalaisi'a mago mafa'nemo aipafati'mo hosu aune ne'mo alino hafaino atale'niya gemae

(Mak 9:14-29; Luk 9:37-42)

14 Apakaemo asole vaya'mo e'a ali'a anupa hu'a mai'nayategamo halate ne'vageno'ae'mo mago vekamo'a Yesutegamo eno ale'ya faino mai'neno'ae'mo, 15 Ala kava nene, huno, mafa'ne'nie'mo kahau huka ato. Negi nagi kava'mo nehigeno agufamo alagepa huno nohane. Muki afina'ae afina'ae'mo atafi'mo asagauno aige anipi'mo asagauno aige nehiye. 16 Gekamo ne'afiya vaya'aitegamo avaleli'na e'noge'apae'mo ali'a alagepa hu'a o'ate'nae, huno ha pai'niye. 17 Yesu'a muki vaya'aife'mo, lapakesa afitapa fatago nosageno lapaipamo kanale huno ohane'niya vayane. Asole afina'mo lapakae'e'mo mai'novana lapakesa afitapa fatago nosae. Na magi afina'mo lapake'na lapatalegauve. Nagaetegamo avalelitapa eyo, huno hapa paiteno 18 Yesu'a hosu aune nefe'mo ke hau'nigeno ani mafa'nemo aipafati'mo ataleno lamino u'nigeno ani afinateti'mo alagepa huno mai'niye.

19 Ge'amo ne'afiya vaya'mo Yesu'a agai'age'mo mai'niyategamo e'apae'mo, na kava higetae'mo afa'a alita ha faita o'atale'none, hu'a afi ge'nae. 20 Yesu'a hapa paino'ae'mo, aise'amo lapakesa afitapa fatago nehaya'mofe'mae. Lama ge lapa nepauve, huno, lapakesa afitapa fatago hu'naya kavatapimo'a aise avina ya'mo masateti avina yakana huno hane'nisiyana lapakaemo mani avee'mo, manile'mo ataleka mugagayaga uvo, hutapa hisageno ugiye. Osisaya agufa kava'mo afa'a hugae. 21 Nunumu nehu'apae'mo ne'ya'mo o'ne'a mo nesisayana ani agufa hosu apaune vaya'mo afa'a ali'a hapa fai'a apatalegae. Alu kavateti'mo ali'a hapa fai'a o'apatalegae.

22 Mago afina'mo ge'amo ne'afiya vaya'e'mo Galeliya kotegamo e'a ali'a anupa hu'a mai'ne'apae'mo Yesu'a hapa paino'ae'mo, apakaemo Vemo mafa'nemo kutulu ya'mo alite'a avaleli'u'a vaya'ai apayapi'mo ategae. 23 Apayapi'mo atesage'a amagisageno faliteno lole'e mago'e afina'mo maitesigeno alino he tino ategaiye, huno hapa pai'nige'a ge'amo ne'afiya vaya'mo lusi kava huno apaipamo'mo kana hu'niye.

Mono notefe'mo takesi monimo apami'niya gemae

24 Yesu'e ge'amo ne'afiya vaya'e'mo Kapeneyamu taonifi'mo e'nage'apae'mo alopa mono notefe'mo takesi monimo ne'aliya vaya'mogi Pitategamo e'a, tisa netapimo'a mono notefe'mo takesi monimo ne'atalefiye, hu'a afi ge'nageno'ae'mo, he ne'atale, huno hapa pai'niye. 25 Pita'a nopi'mo faleno hai'nigeno'ae'mo Yesu'a hogoteno ge huno afi ge'niye, Saimoniyo, na agufa kagesamo ne'afine. Ma mopafi'mo yagai'a ne'apataya ala vaya'apimogi haiya vaya'aiteti'mo kagemi yatefe'mo ne'aliya takesi'e apakilefe'mo ne'aliya takesi'e'mo ne'aliye. Mafa'ne'apileti'e'mo ne'alifi alu kotega vaya'aiteti'e'mo ne'aliye, huno afi ge'nigeno'ae'mo, 26 alu kotega vaya'aiteti'e'mo ne'aliye, huno ha pai'nigeno, he, mafa'ne'apimo afa'a apatalesage'a maigae. 27 Mafa'ne'amo mai'nova'monanafa fiku yanageta'a monimo alita'a o'malesu'ana apaipamo'mo hosugiye. Kagaemo ani kotutegamo lamika anipi'mo hukumo yaga auka male'nekae'mo hogoteka alisana noyamemo avayafi'mo alaga monimo hane'nisigeka agegananagi nagae'e kagae'e'mo apamisu'a monimo hanegaiyanagi alinikuka alopa mono notefe'mo takesi ne'aliya vaya'mo nagae takesi moni'e kagaika takesi moni'e'mo apamiyo, huno ha pai'niye.